هل سيرتك الذاتية جيدة بما يكفي لتحصل على وظيفة احلامك، تعد السيرة الذاتية القوية تصنع الفارق عندما يكون لديك المئات من المنافسين على نفس الوظيفة.
في سياق المقالة التالية نوضح خطوات بسيطة لإنشاء سيرة ذاتية إحترافية.
طيب نعمل ايه ؟؟ هقولك يا سيدى دلوقتى دى سيره ذاتيه او فكر فيها على انها وثيقه تعارف بينك وبين المكان اللى انت رايح تقدم فيه و ما دامت وثيقه تعارف يبقى لازم يبقى فيها معلومات عنك ، وده هيجاوبك على السؤال الاول اكتب ايه ؟؟
هتكتب الحاجه اللى المكان اللى انت رايحله عاوز يعرفها عنك وبشكل بسيط فيه سبع نقط اساسيين لازم يبقوا موجودين فى اى C.V
(الاسم – معلومات الاتصال ( الايميل و التليفون و العنوان)- معلومات شخصيه عامه – الخبرات التعليمه – الخبرات العمليه السابقه – الأعمال التطوعية إن وجد – المهارات الشخصيه) و هقولك تكتب تحت كل حاجه ايه :
1-الاسم : يا ريت تكتب الاسم بشكل عادى يعنى بلاش بشكل زخرفى
2- معلومات الاتصال : لازم تكون حديثه و واضحه لان هى دى اللى هيتم التواصل معاك منها ، و لو تقدر تعمل ايميل خاص بالشغل يبقى افضل و يبقى اسمه واضح بلاش اسامى دلع .
3- معلومات شخصيه عامه : اكتب تاريخ ميلادك ، الحاله الاجتماعيه ، موقفك التجنيدى (طبعا دى مش للبنات)
4- الخبرات التعليميه : اول حاجه هتكتب الشهاده الاساسيه بتاعتك بكالوريوس او ليسانس او دبلوم و تكتب سنه التخرج و اسم الجامعه
و بعد كده تكتب الكورسس اللى انت واخدها بقى ، هتكتب اسم الكورس و المكان اللى اخدته منه و مده الدراسه بتاعته و تاريخ حصولك على الشهاده
طيب لو لسه بتدرس ؟ اكتب انك بتدرس و فى المستوى الكام و بقالك فتره قد ايه بتدرس
5- الخبرات العمليه السابقه : ابتدى من الاحدث للاقدم ، هتكتب اسم المكان اللى كنت بتشتغل فيه و كنت بتشتغل ايه بالضبط و قعدت تشتغل هناك كام سنه
6- المهارات الشخصيه : اكتب انت شايف فى نفسك ايه من المميزات فيه 3 او 4 حاجات بيتكتبوا فى اى C.V و هى انك بتملك مهارات الاتصال و تجيد العمل تحت ضغط و تجيد العمل فى فريق عمل و ممكن تضيف لده حاجات الوظيفه اللى انت رايحلها محتاجاها زى انك هادئ مثلا او نشيط او لديك القدره على الاقناع مثلا انت بتكتب عن نفسك فى النهايه .
وهتلاقي في الكومنتات شكلين من اشكال السيرة الذاتية هيساعدوك ممكن تعمل زيهم ولو عايزهم ابعتلنا وهنبعتلك الملف نفسه وممكن تعدل فيه براحتك
تابعنا عشان تعرف نصايح اكتر عن كتابة السيرة الذاتية.
Author: أحمد سبع الليل
أحمد سبع الليل مدير مشروع إيجاد سبب للبقاء، عمل علي إدارة عدد من المنصات الإلكترونية والمبادرات المجتمعية
