لو لسا بتعمل السيرة الذاتية (C.V) بتاعتك دي عشر نصايح مهمة هتنفعك:
1- حاول ان الـ C.V يكون شكله عملى اوى بلاش يكون مبهرج و لا فيه اشكال و الخط اللى بتكتب بيه يكون متوسط مش كبير و لا صغير و يكون منظم مش كلمه يمين و كلمه شمال.
2- يكون مليان بس مختصر اكتب المهم و بشكل نقط و بلاش تطويل و اعاده انت مش بتكتب موضوع تعبير يعنى حاول مايزيدش عن صفحة.
3- مهم جدا ان اللى مذكور فى الC.V يكون صادق و مطابق للى عندك ما ينفعش تكتب انك معاك كورس كمبيوتر مثلا و انت مش بتعرف تنزل ويندوز او كورس لغه و انت مش عارف تنطق.
4- فيه نقط تانيه تقدر تضيفها لل C.V يعنى ممكن تقول الهوايات او الاهتمامات بتاعتك عموما لو ليك خبره معينه فى مجال ما اكتبها.
5- و انت بتكتب الخبرات السابقه الافضل انك بلاش تكتب اى شغل اشتغلته و مشيت منه قبل شهرينر لانه بعد كده فى المقابله هيسألك مشيت ليه و ده ممكن يديله انطباع انك مش ملتزم بالشغل و بتحب تتنقل كتير.
6- حاول تكتب خبره يكون ليها علاقه بالشغل اللى انت رايحه بحيث اللى قدامك يحس انك مش ضايع و انك عندك على الاقل مبادئ و ممكن تتطور بالتدريب.
7- ماينفعش تسيب فراغات بين سنه تخرجك و لغايه الوقت اللى بتقدم فيه ، يعنى ما ينفعش تقول اصلى قعدت فى البيت لازم تكون بتعمل حاجه يا بتدرس يا بتشتغل ، الا لو ظروف قهرية زى المرض.
8- دايما خلى عندك سؤال و انت بتكتب هو عاوز يعرف عنى ايه ؟ و ياترى لما هيعرف النقطه دى ده هيخليه يميل انه يقبلنى ولا يرفضنى؟ و ما تقولش على حاجه تافهه اكتب اللى عندك كله بس فى سياق الدراما ، وما تتكسفش و يا سلام لو عندك خبره شغل اثناء الدراسه حتى لو بسيطة.
9- النت مليان بنماذج للسيره الذاتيه نزل شويه و عدل فيهم و ضيف اللى انت عايزه او نقص برضه اللى انت عايزه و اعمل C.V مميز خاص بيك انت ولو عايز فورمة تقدر تعدل عليها ابعتلنا رسالة وهنبعتهالك.
10- السيرة الذاتية مش عقده ولا مشكلة متصعبهاش على نفسك انت بتعرف نفسك و بتقول و الله انا فلان و عندى اللى مكتوب ده و بدور على شغل بس كده.
النصائح من إعداد مركزالتدريب و التشغيل المهني – Vtec
Author: أحمد سبع الليل
أحمد سبع الليل مدير مشروع إيجاد سبب للبقاء، عمل علي إدارة عدد من المنصات الإلكترونية والمبادرات المجتمعية
